ಏರ್ ಬಬ್ಬಲ್ ಒಪ್ಪಂದದ ಮಾತುಕತೆ ತಡೆ

ಬೆಂಗಳೂರು (ಕನ್ನಡನಾಡಿ ಸುದ್ದಿಜಾಲ): ಕರೋನ ಸೋಂಕಿತರು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಭಾರತ ಮತ್ತು ಸೌದಿ ಅರೇಬಿಯಾ ನಡುವಿನ ಏರ್ ಬಬ್ಬಲ್ ಒಪ್ಪಂದದ ಕುರಿತು ಮಾತುಕತೆಗಳನ್ನು ತಡೆಹಿಡಿಯಲಾಗಿದೆ ಎಂದು ಕೇಂದ್ರ ವಿದೇಶಾಂಗ ವ್ಯವಹಾರಗಳ ರಾಜ್ಯ ಸಚಿವ ವಿ ಮುರಳೀಧರನ್ ಹೇಳಿದ್ದಾರೆ. ಈ ಕುರಿತು ಸಂಸತ್ತಿನಲ್ಲಿ ಚರ್ಚೆ ನಡೆದಿದ್ದು  ತಮಗೆ ಕೇಳಲಾದ ಪ್ರಶ್ನೆಗೆ ಸಚಿವ ವಿ ಮುರಳೀಧರನ್ ಉತ್ತರಿಸಿದರು.

ಏರ್ ಬಬ್ಬಲ್ ಕುರಿತ ಮಾತುಕತೆಗಳು ಅಂತಿಮ ಸ್ವರೂಪಕ್ಕೆ  ಬಂದಿದ್ದವು. ಆದರೆ ಕೋವಿಡ್ ವಿಸ್ತರಣೆಯಿಂದಾಗಿ ಸೌದಿ ಅರೇಬಿಯಾ ಭಾರತದಿಂದ ವಿಮಾನಗಳನ್ನು ನಿಷೇಧಿಸಿದ್ದರಿಂದ ಮಾತುಕತೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ. ಅದೇ ಸಮಯದಲ್ಲಿ, ಏರ್ ಬಬಲ್‌ಗೆ ಸಹಿ ಹಾಕುವ ಪ್ರಕ್ರಿಯೆ ಇನ್ನೂ ಮುಂದುವರಿದಿದೆ ಎಂದು ಸಚಿವರು ಸ್ಪಷ್ಟನೆ ನೀಡಿದ್ದಾರೆ.  ಲಕ್ಷಾಂತರ ಭಾರತೀಯರು ಮರಳಿದ್ದಾರೆ..

ವಂದೇ ಭಾರತ್ ಮಿಷನ್ ಯೋಜನೆಯ ಮೂಲಕ ಈವರೆಗೆ 7,16,000 ಭಾರತೀಯರು ಕೊಲ್ಲಿಯಿಂದ ಮರಳಿದ್ದಾರೆ ಎಂದು ಅವರು ಹೇಳಿದರು. ಪ್ರಸ್ತುತ, ಭಾರತವು ಸೌದಿ ಅರೇಬಿಯಾವನ್ನು ಹೊರತುಪಡಿಸಿ ಐದು ಗಲ್ಫ್ ರಾಷ್ಟ್ರಗಳು ಸೇರಿದಂತೆ 28 ದೇಶಗಳೊಂದಿಗೆ ಏರ್ ಬಬಲ್ ಒಪ್ಪಂದಗಳನ್ನು ಹೊಂದಿದೆ ಎಂದು ಅವರು ವಿವರಣೆ  ನೀಡಿದ್ದಾರೆ.