Bollywood: ಹಿಂದಿ ಚಿತ್ರರಂಗದ ಸಾರ್ವಕಾಲಿಕ ಅತ್ಯುತ್ಸಾಹದ ಚಿಲುಮೆ ಶಮ್ಮಿ ಕಪೂರ್

“ಶಮ್ಮಿ ಕಪೂರ್” ಹೆಸರೇ ರೋಮಾಂಚನಗೊಳಿಸುವಂಥದ್ದು. ಯಾವಾಗಲೂ ಉತ್ಸಾಹದಿಂದ ಪುಟಿಯುತ್ತಲೇ ಇರುವಂತಹ ಪಾತ್ರಗಳಲ್ಲಿ ಅಭಿನಯಿಸಿದ ಅವರದು ನಿಜ ಜೀವನದಲ್ಲೂ ಅದೇ ರೀತಿ ಇದ್ದ ವ್ಯಕ್ತಿತ್ವ. ಪ್ರೇಕ್ಷಕರನ್ನು ತನ್ನ ವಿಶಿಷ್ಟ ದೇಹಭಾಷೆಯ ನಟನೆ-ನರ್ತನದಿಂದ ಮೋಡಿ ಮಾಡಿದ ಕಪೂರ್ ವಂಶಾವಳಿಯ ಪ್ರತಿಭೆ. ದಿಲೀಪ್ ಕುಮಾರ್, ದೇವಾನಂದ್, ಹಾಗೂ ಅಣ್ಣ ರಾಜಕಪೂರ್ ಹಿಂದಿ ಚಿತ್ರರಂಗವನ್ನು ನಾಯಕರಾಗಿ ಆಳುತ್ತಿದ್ದ ಕಾಲದಲ್ಲಿ ಅವರೆಲ್ಲರಿಗಿಂತ ವಿಭಿನ್ನ ಶೈಲಿಯನ್ನು ರೂಢಿಸಿಕೊಂಡು ನಾಯಕ ಎಂದರೆ ಹೀಗೇ ಇರಬೇಕೆನ್ನುವ ಸಿದ್ಧ ಪರಿಭಾಷೆಯನ್ನೇ ಬದಲಾಯಿಸಿದವರು ಶಮ್ಮಿ ಕಪೂರ್. ಅಂತಹ ಶಮ್ಮಿ ಕಪೂರ್ ಅವರ ಜನ್ಮ ವಾರ್ಷಿಕೋತ್ಸವದ ಅಂಗವಾಗಿ ಅವರನ್ನು ಸ್ಮರಿಸಲು ಈ ಪ್ರಯತ್ನ.

ಅವರ 19ನೇ ಚಿತ್ರ “ತುಮ್ ಸಾ ನಹಿ ದೇಖಾ” ವರೆಗೂ ನಟಿಸಿದ ಎಲ್ಲ 18 ಚಿತ್ರಗಳೂ ಸತತ ಸೋಲನ್ನು ಕಂಡರೂ ಧೃತಿಗೆಡದೇ ತಮ್ಮ 19ನೇ ಚಿತ್ರದಿಂದ ಫೀನಿಕ್ಸ್ ಹಕ್ಕಿಯಂತೆ ಮರುಜನ್ಮ ಪಡೆದವರು ಶಮ್ಮಿ ಕಪೂರ್. ತಮ್ಮ ಸತತ ಸೋಲುಗಳ ಬಗ್ಗೆ ಗಂಭಿರವಾಗಿ ಚಿಂತಿಸಿದ ಅವರು ತಮ್ಮ ವ್ಯಕ್ತಿತ್ವದಲ್ಲಿ ಆಮೂಲಾಗ್ರ ಬದಲಾವಣೆ ತಂದುಕೊಂಡು ಅಭಿನಯಿಸಿದರೆ ಮಾತ್ರ ಪ್ರೇಕ್ಷಕರ ಮನಗೆಲ್ಲಬಹುದು ಎಂದು ಮನಗಂಡರು. ನಂತರ, ತಮ್ಮ ಪತ್ನಿ ಗೀತಾ ಬಾಲಿಯವರ ಸಹಕಾರದಿಂದ ತಮ್ಮ ವಸ್ತ್ರವಿನ್ಯಾಸದಲ್ಲಿ ಬದಲಾವಣೆ ತಂದುಕೊಂಡು ತಮ್ಮದೇ ಸ್ವಂತ ಉಡುಪುಗಳನ್ನು ಧರಿಸಿ ಚಿತ್ರಗಳಲ್ಲಿ ಅಭಿನಯಿಸತೊಡಗಿದ್ದಲ್ಲದೇ ಮೀಸೆಯಿಲ್ಲದೇ ಅಭಿಯಿಸಲು ಪ್ರಾರಂಭಿಸಿ ತಮ್ಮ ರೂಪದಲ್ಲೂ ಬದಲಾವಣೆ ತಂದುಕೊಂಡರು. ಅವರು ಹೊಸ ವಿನ್ಯಾಸದ ಷರ್ಟ್‌ಗಳು, ಜೀನ್ಸ್ ಉಡುಪುಗಳು, ಹಾಗೂ ಸ್ಕಾರ್ಫ್‌ಗಳನ್ನು ಧರಿಸಲು ಪ್ರಾರಂಭಿಸಿದ ನಂತರ ಅವೇ ಆಗಿನ ಯುವಕರ ನೆಚ್ಚಿನ ವಸ್ತ್ರಗಳಾಗಿ ಅವನ್ನೇ ಧರಿಸುವ ಟ್ರೆಂಡ್ ಪ್ರಾರಂಭವಾಯಿತು.

ನಾಸಿರ ಹುಸೇನ್‌ 1957ರಲ್ಲಿ ನಿರ್ಮಿಸಿದ “ತುಮ್ ಸಾ ನಹಿ ದೇಖಾ” ಚಿತ್ರದಿಂದ ಹಿಂದಿ ಚಿತ್ರದಲ್ಲಿ ನೆಲೆ ನಿಂತ ಶಮ್ಮಿ ಕಪೂರ್ ಅಲ್ಲಿಯವರೆಗೆ ಇದ್ದ ನಾಯಕನ ಪರಿಕಲ್ಪನೆಯನ್ನೇ ಬದಲಾಯಿಸಿಬಿಟ್ಟರು. ಅಲ್ಲಿಯವರೆಗೂ ಪ್ರೇಮಪ್ರಸಂಗಗಳಲ್ಲಿ ಒಂದು ಮಿತಿಮೀರದ ಅಭಿನಯವನ್ನು ನೀಡುತ್ತಿದ್ದ ಇತರ ನಾಯಕರಿಗೆ ಹೋಲಿಸಿದರೆ ಇವರದು ಸ್ವಲ್ಪ ಅತಿರೇಕ ಎಂದೂ ಅನಿಸಬಹುದಾದ ಆಭಿನಯವಾಗಿತ್ತು. ತಮ್ಮ ಆಕರ್ಷಕ ವ್ಯಕ್ತಿತ್ವ, ಮೃದುವಾದ ಧ್ವನಿಯಿಂದ ಹೇಳುವ ಸಂಭಾಷಣೆ, ಕನಸು ಕಾಣುವ ಕಣ್ಣುಗಳು, ಮಾದಕ ನೋಟಗಳಿಂದ ಕೂಡಿದ ಅಭಿನಯದಿಂದ ಹೊಸದೊಂದು ಲೋಕವನ್ನೇ ಸೃಷ್ಟಿಸುತ್ತಿದ್ದ ಶಮ್ಮಿ ಕಪೂರ್ ಕೋಟ್ಯಂತರ ಅಭಿಮಾನಿಗಳ ಮನಗೆಲ್ಲುವಲ್ಲಿ ಯಶಸ್ವಿಯಾದರು. ಯಾವುದೇ ಸಿದ್ಧಸೂತ್ರಗಳಲ್ಲಿ ಬಂದಿಯಾಗಲು ಒಪ್ಪದ ಶಮ್ಮಿ ಕಪೂರ್ ತಮ್ಮ ತಂದೆ ಪೃಥ್ವಿರಾಜ್ ಕಪೂರ್‌ರನ್ನಾಗಲೀ ಅಥವಾ ಸೋದರ ರಾಜ್‌ ಕಪೂರ್‌ರನ್ನಾಗಲೀ ಅನುಕರಿಸಲು ಒಪ್ಪದೇ ತಮ್ಮದೇ ಆದ ಶೈಲಿಯನ್ನು ಬೆಳೆಸಿಕೊಂಡು ಅಲ್ಲಿಯವರೆಗೂ ಇದ್ದ ನಾಯಕನ ಇಮೇಜನ್ನೇ ಬದಲಿಸಿಬಿಟ್ಟರು.

ಹಿಂದಿ ಚಿತ್ರರಂಗದ ಪ್ರಖ್ಯಾತ ನಟ ನಾಸಿರುದ್ದೀನ್ ಶಾ ಅವರ ದೊಡ್ಡ ಅಭಿಮಾನಿಯಾಗಿದ್ದು ಅವರು “ಯಾರೂ ಅನುಕರಿಸಲಾಗದ ನೃತ್ಯ ಹಾಗೂ ನಟನಾಶೈಲಿಗಳನ್ನು ಹೊಂದಿದ್ದ ಶಮ್ಮಿ ಕಪೂರ್ ಅವರೊಬ್ಬರು ವಿಶ್ವದ ಶ್ರೇಷ್ಠ ನಟ” ಎಂದಿದ್ದರು. ಇಂತಹ ಚೇತೋಹಾರಿ ಅನುಭವ ನೀಡಿದ ಶಮ್ಮಿ ಕಪೂರ್‌ರನ್ನು ಅವರ ಜನ್ಮ ವಾರ್ಷಿಕೋತ್ಸವದ ಸಂದರ್ಭದಲ್ಲಿ ನಾವೆಲ್ಲಾ ಸ್ಮರಿಸೋಣ.

Shammi Kapoor was a lengend in his own right and completely changed the concept of how a hero should look in hindi film industry

ಇದನ್ನೂ ಓದಿ: Viral Vide: ಜಾಹ್ನವಿ ಕಪೂರ್‌ಗೆ ಅಪ್ಪ ಅಂದ್ರೆ ಅದೆಷ್ಟು ಪ್ರೀತಿ: ವೈರಲ್ ಆಯ್ತು ಮಗಳ ಕಾಳಜಿ
ಇದನ್ನೂ ಓದಿ: Xiaomi: ವಿದ್ಯುತ್ ಕಾರುಗಳ ಉತ್ಪಾದನಾ ರಂಗಕ್ಕೆ ಧುಮುಕಲಿದೆ ಚೀನಾದ ಸ್ಮಾರ್ಟ್‌ಫೋನ್ ದಿಗ್ಗಜ ಶಿಯೋಮಿ