ಕಲ್ಲಿದ್ದಲು ಕೊರತೆ (Coal Crisis) ಈಗ ದೇಶಾದ್ಯಂತ ಸದ್ದು ಮಾಡುತ್ತಿರುವ ದೊಡ್ಡ ಸುದ್ದಿ. ಕೇಂದ್ರ ಮತ್ತು ಬಿಜೆಪಿ ಆಡಳಿತದ ಸರ್ಕಾರಗಳು ಕಲ್ಲಿದ್ದಲು ಕೊರತೆಯಿಲ್ಲ, ವಿದ್ಯುತ್ ಉತ್ಪಾದನೆಗೆ ಯಾವುದೇ ಸಮಸ್ಯೆ ಆಗುವುದಿಲ್ಲ ಎಂದು ಭರವಸೆಯ ಮಾತುಗಳನ್ನು ಆಡುತ್ತಿವೆ. ಆದರೆ ಪ್ರತಿಪಕ್ಷಗಳು ಮತ್ತು ಬಿಜೆಪಿಯೇತರ ಪಕ್ಷಗಳ ಆಡಳಿತ ಇರುವ ರಾಜ್ಯಗಳು ಈ ಭರವಸೆಯನ್ನು ತಳ್ಳಿಹಾಕಿದೆ. ಹಿಂದೆ ಕೊರೊನಾ ವ್ಯಾಪಿಸಿದ್ದಾಗ ಆಮ್ಲಜನಕದ ವಿಚಾರದಲ್ಲಿಯೂ ಸರ್ಕಾರ ಹೀಗೆಯೇ ಹೇಳಿತ್ತು. ಆದರೆ ವಾಸ್ತವ ಸ್ಥಿತಿ ಬೇರೆಯೇ ಇತ್ತು. ಈಗಲೂ ಹಾಗೆಯೇ ಆಗಿದೆ ಎಂದು ದೂರುತ್ತಿವೆ. ರಾಜಕೀಯ ಹೇಳಿಕೆಗಳನ್ನು ಬದಿಗಿಡೋಣ. ಆದರೆ ವಿದ್ಯುತ್ ಉಳಿಸುವುದು ಯಾವಾಗಲೂ ಒಳ್ಳೆಯದು. ದೇಶದ ಜವಾಬ್ದಾರಿಯುತ ನಾಗರಿಕರಾಗಿ ಅದು ನಮ್ಮೆಲ್ಲರ ಕರ್ತವ್ಯ.
ವಿದ್ಯುತ್ ಉಳಿತಾಯಕ್ಕೆ ಹಾಗೂ ಮುಂದಿನ ದಿನಗಳಲ್ಲಿ ಎದುರಾಗಬಹುದಾದ ವಿದ್ಯುತ್ ಕೊರತೆಯ ಸನ್ನಿವೇಶ ನಿರ್ವಹಣೆಗೆ ನಾವೆಲ್ಲರೂ ಅಳವಡಿಸಿಕೊಳ್ಳಬಹುದಾದ 10 ಉಪಾಯಗಳು ಇಲ್ಲಿವೆ.
1) ಬಳಸದೇ ಇರುವಾಗ ಎಲ್ಲಾ ದೀಪಗಳ ಮತ್ತು ವಿದ್ಯುತ್ ಉಪಕರಣಗಳ ಸ್ವಿಚ್‌ಗಳನ್ನು ಆರಿಸಿ.
2) ಬುರುಡೆ ಬಲ್ಬ್‌, ಟ್ಯೂಬ್‌ ಲೈಟ್, ಸಿಎಫ್‌ಎಲ್ ಬದಲಿಗೆ ಎಲ್‌ಇಡಿ ಬಲ್ಬ್‌ಗಳ ಬಳಕೆ ಶುರು ಮಾಡಿ.
3) ಮಿಕ್ಸಿಗೆ ಹಾಕುವ ಮೊದಲು ಅಗತ್ಯ ಸಿದ್ಧತೆ ಮಾಡಿಕೊಳ್ಳಿ. ಬೇಕಿರುವಷ್ಟೇ ನಯವಾಗಿ ರುಬ್ಬಿಕೊಳ್ಳಿ. ಮಿಕ್ಸಿ ಬಳಕೆ ಹೆಚ್ಚು ವಿದ್ಯುತ್ ಬೇಡುತ್ತದೆ.
4) ಸೊಳ್ಳೆ ಬರುತ್ತೆ ಅಂತ ಮೂರು ಹೊತ್ತೂ ಕಿಟಕಿ ಹಾಕಿವ ಸ್ವಭಾವ ನಿಮ್ಮದಾಗಿದ್ದರೆ ಮೊದಲು ಕಿಟಕಿಗೆ ಮೆಶ್ ಹಾಕಿಸಿ. ಕಿಟಕಿ ತೆರೆದರೆ ಒಳ್ಳೆಯ ಗಾಳಿ-ಬೆಳಕು ಮನೆಗೆ ಬರುತ್ತೆ. ಫ್ಯಾನ್-ಲೈಟ್ ಮೇಲಿನ ಅವಲಂಬನೆ ತಪ್ಪುತ್ತೆ. ನೈಸರ್ಗಿಕ ಗಾಳಿ ಬೆಳಕು ಆರೋಗ್ಯಕ್ಕೂ ಒಳ್ಳೆಯದು.
5) ವಾಷಿಂಗ್‌ ಮಷಿನ್ ಜೊತೆಗೆ ಹತ್ತಾರು ಆಯ್ಕೆಗಳು ಇರುತ್ತವೆ. ಅದನ್ನು ಸರಿಯಾಗಿ ತಿಳಿದುಕೊಳ್ಳಿ. ಅನಗತ್ಯವಾಗಿ ಬಿಸಿನೀರು ಬಳಸುವುದು, ಹೆಚ್ಚುವರಿಯಾಗಿ ಜಾಲಿಸುವುದು ಬೇಡ.
6) ನೀರಿನ ಮಿತವ್ಯಯ ಸಾಧ್ಯವಾದರೆ ವಿದ್ಯುತ್ ಸಹ ಉಳಿತಾಯವಾಗುತ್ತೆ. ಹೇಗೆ ಅಂದ್ರಾ? ನಿಮ್ಮ ಸಂಪ್‌ನಲ್ಲಿರುವ ನೀರನ್ನು ಮನೆ ಮೇಲಿನ ಟ್ಯಾಂಕ್‌ಗೆ ಕಳಿಸಲು ಪಂಪ್ ಬೇಕು. ಈ ಪಂಪ್ ಬಳಕೆಗೆ ವಿದ್ಯುತ್ ಬೇಕು. ಮನೆ ಎದುರಿನ ಕೈತೋಟಕ್ಕೆ ಅಲ್ಲಿಯೇ ತೊಟ್ಟಿಯೊಂದನ್ನು ನಿರ್ಮಿಸಿಕೊಂಡು, ನೀರು ತುಂಬಿಸಲು ಪ್ಲಾನ್ ಮಾಡಿ. ಕೈತೋಟಕ್ಕೆ, ಹೊರಗಿನಿಂದ ಬಂದವರ ಕೈಕಾಲು ತೊಳೆಯಲು ಅದೇ ನೀರು ಬಳಸುವಂತಾದರೆ ಪಂಪ್ ಬಳಕೆ ಕನಿಷ್ಠಮಟ್ಟಕ್ಕೆ ಇಳಿಯುವುದನ್ನು ನೀವೇ ಗಮನಿಸುವಿರಿ.
7) ನೀರು ಬಿಸಿ ಮಾಡಲು ವಿದ್ಯುತ್ ಹೀಟರ್, ಬಾಯ್ಲರ್ ಅಥವಾ ಇಮರ್ಷನ್ ಕಾಯಿಲ್ ಬಳಸುತ್ತಿದ್ದರೆ ಪರ್ಯಾಯಗಳನ್ನು ಯೋಚಿಸಿ. ಸೋಲಾರ್ ಹೀಟರ್ ಬಳಕೆ ಸದಾ ಕಾಲಕ್ಕೂ ಒಳ್ಳೆಯದು, ವಿದ್ಯುತ್ ಬಿಲ್‌ನಲ್ಲಿ ರಿಯಾಯ್ತಿಯೂ ಸಿಗುತ್ತದೆ. ಎಲ್ಲಕ್ಕೂ ಮಿಗಿಲಾಗಿ ಬಿಸಿನೀರಿಗೆ ಸೋಲಾರ್ ಬಳಸುವುದು ಪರಿಸರ ಸ್ನೇಹಿಯೂ ಹೌದು. ನೀರಿಗಾಗಿ ಗ್ಯಾಸ್ ಗೀಸರ್‌ನಂಥ ಆಯ್ಕೆಗಳೂ ಇವೆ ಎಂಬುದನ್ನು ಮರೆಯದಿರಿ. ಬಿಸಿಲು ಚೆನ್ನಾಗಿದ್ರೆ ತಣ್ಣೀರು ಸ್ನಾನವನ್ನೇ ಮಾಡಿದರೂ ಆಯ್ತಲ್ಲ?
8) ಏರ್‌ಕೂಲರ್ ಅಥವಾ ಏರ್‌ಕಂಡಿಷನರ್‌ಗಳು ಮನೆಯಲ್ಲಿವೆ ಎಂಬ ಒಂದೇ ಕಾರಣಕ್ಕೆ ಬಳಸಲೇಬೇಕು ಎಂಬ ಹಟ ಸಲ್ಲದು. ಅಗತ್ಯ ನೋಡಿಕೊಂಡು ಬಳಸಿ. ವಿದ್ಯುತ್ ಉಳಿಸಿ.
9) ಟಿವಿ ಅಥವಾ ಕಂಪ್ಯೂಟರ್‌ ಸಿಸ್ಟಂಗಳನ್ನು ಅಗತ್ಯವಿಲ್ಲದಿದ್ದರೆ ಆನ್ ಮಾಡಿ ಮರೆತುಬಿಡಬೇಡಿ. ಕೆಲಸ ಮುಗಿದ ಮೇಲೆ ಸಿಸ್ಟಂಗಳನ್ನು ಶಟ್‌ಡೌನ್ ಮಾಡಿ, ನೋಡುವುದು ಮುಗಿದ ತಕ್ಷಣ ಟಿವಿಯನ್ನು ಮರೆಯದೇ ಆಫ್ ಮಾಡಿ.
10) ಮನೆಗೆ ಯುಪಿಎಸ್ ವ್ಯವಸ್ಥೆ ಮಾಡಿಕೊಂಡಿದ್ದರೆ ಬ್ಯಾಟರಿಯ ಡಿಸ್ಟಿಲ್ಡ್‌ ವಾಟರ್‌ ಮಟ್ಟ ಪರಿಶೀಲಿಸಿ. ಬ್ಯಾಟರಿ ಬಾಳಕೆಯು ಅದರ ಸೈಕಲ್‌ ಮೇಲೆ ಆಧಾರವಾಗಿರುತ್ತದೆ. ಎರಡು-ಮೂರು ತಿಂಗಳಿಗೆ ಒಮ್ಮೆಯಾದರೂ ಮೇನ್ಸ್‌ ಆಫ್ ಮಾಡಿ ಬ್ಯಾಟರಿಯ ವಿದ್ಯುತ್ ಪೂರ್ತಿ ಖಾಲಿಯಾಗಲು ಅವಕಾಶ ಮಾಡಿಕೊಡಿ. ನಂತರ ಚಾರ್ಜ್ ಮಾಡಿ. ಕರೆಂಟ್ ಹೋಗಬಹುದು ಎಂದಿದ್ದಾಗ ಇಂಥ ರಿಸ್ಕ್ ತೆಗೆದುಕೊಳ್ಳಲು ಹೋಗಬೇಡಿ.
Tips to save electricity and enhance UPS durability in coal crisis time
ಇದನ್ನೂ ಓದಿ: ಕಲ್ಲಿದ್ದಲಿಗೆ ತೀವ್ರ ತತ್ವಾರ
ಇದನ್ನೂ ಓದಿ: ಮುಂಬೈ ಬಿಇಎಸ್‌ಟಿ ಡಿಪೋದಲ್ಲಿ ಟಾಟಾ ಸಂಸ್ಥೆಯಿಂದ ವಿದ್ಯುಚ್ಚಾಲಿತ ಬಸ್‌ಗಳ ಸಂಪೂರ್ಣ ಚಾರ್ಜಿಂಗ್ ಘಟಕ ಸ್ಥಾಪನೆ
Discussion about this post