ಭಾರತೀಯ ಮಹಿಳಾ ಕ್ರಿಕೆಟ್‌ ಬಾನಂಗಳದಲ್ಲಿ ಹೊಳೆಯುವ ತಾರೆಯಾಗಿ ಉದಯಿಸಿದ ಸ್ಮೃತಿ ಮಂಧಾನ

ಇತ್ತೀಚಿನ ಕೆಲ ವರ್ಷಗಳಿಂದ ಭಾರತೀಯ ಕ್ರೀಡಾರಂಗದ ಸುವರ್ಣಯುಗವೇ ಆರಂಭವಾಗಿದೆಯೇನೋ ಎಂದೆನಿಸುವಂಥ ಪ್ರದರ್ಶನಗಳನ್ನು ನಮ್ಮ ಕ್ರೀಡಾಪಟುಗಳು ಎಲ್ಲಾ ಕ್ರೀಡೆಗಳಲ್ಲೂ ನೀಡುತ್ತಾ ಬರುತ್ತಿದ್ದಾರೆ. ಮೊನ್ನೆ-ಮೊನ್ನೆ ನಡೆದ ಒಲಂಪಿಕ್ಸ್‌ ಕ್ರೀಡಾಕೂಟದಲ್ಲೂ ಸಹ ಭಾರತೀಯ ಕ್ರೀಡಾಪಟುಗಳು ಅನೇಕ ಕ್ರೀಡೆಗಳಲ್ಲಿ ಪದಕಗಳನ್ನು ಗೆಲ್ಲುವ ಮೂಲಕ ದೇಶಕ್ಕೆ ಕೀರ್ತಿ ತಂದಿದ್ದಾರೆ.

ಇಲ್ಲಿಯವರೆಗೂ “ಆಟಕ್ಕುಂಟು ಲೆಕ್ಕಕ್ಕಿಲ್ಲ” ಎಂಬಂತೆ ಪಂದ್ಯಾವಳಿಗಳಲ್ಲಿ ಭಾಗವಹಿಸಿ “ಹೋದ ಪುಟ್ಟ-ಬಂದ ಪುಟ್ಟ” ಎಂಬಂತೆ ಪದಕರಹಿತರಾಗಿಯೋ ಅಥವಾ ಒಂದೋ-ಎರಡೋ ಕಂಚಿನ ಪದಕಗಳನ್ನು ಪಡೆದು ಬರುತ್ತಿದ್ದ ನಮ್ಮ ಕ್ರೀಡಾಪಟುಗಳು ಚಿನ್ನ-ಬೆಳ್ಳಿ ಪದಕಗಳನ್ನು ಗೆದ್ದು ತರುತ್ತಾ ನಾವೆಲ್ಲರೂ ಹೆಮ್ಮೆ ಪಡುವಂತೆ ಮಾಡುತ್ತಿದ್ದಾರೆ ಹಾಗೂ ಅಂತರರಾಷ್ಟ್ರೀಯ ಮಟ್ಟದಲ್ಲಿ ದೇಶಕ್ಕೆ ಕೀರ್ತಿ ತರುತ್ತಿದ್ದಾರೆ.  ಈ ಪಟ್ಟಿಗೆ ಹೊಸ ಸೇರ್ಪಡೆಯೆಂದರೆ, ಭಾರತೀಯ ಮಹಿಳಾ ಕ್ರಿಕೆಟ್‌ ತಂಡದ ಸದಸ್ಯೆ, ಸ್ಮೃತಿ ಮಂಧಾನ.

ಸ್ಮೃತಿ ಮಂಧಾನ ೧೮ನೇ ಜುಲೈ ೧೯೯೬ ರಂದು ಮುಂಬೈನಲ್ಲಿ ಸ್ಮಿತಾ ಹಾಗೂ ಶ್ರೀನಿವಾಸ್‌ ಮಂಧಾನ ದಂಪತಿಗಳ ಮಗಳಾಗಿ ಜನಿಸಿದರು.  ತಮ್ಮ ಶಾಲಾದಿನಗಳಲ್ಲಿ ತಂದೆ ಶ್ರೀನಿವಾಸ್‌ ಹಾಗೂ ಅಣ್ಣ ಶ್ರವಣ್‌ (ಜಿಲ್ಲಾ ಮಟ್ಟದ ಕ್ರಿಕೆಟ್‌ ಆಟಗಾರ) ಕ್ರಿಕೆಟ್‌ ಆಡುತ್ತಿದ್ದುದನ್ನು ನೋಡುತ್ತಿದ್ದ ಸ್ಮೃತಿಗೂ ಕ್ರಮೇಣ ಕ್ರಿಕೆಟ್‌ ಆಟದಲ್ಲಿ ಆಸಕ್ತಿ ಮೂಡಿ ತಾವೂ ಆಡಲು ಪ್ರಾರಂಭಿಸಿದರು.  ತಮ್ಮ ೯ನೆಯ ವಯಸ್ಸಿನಲ್ಲಿ ಮಹಾರಾಷ್ಟ್ರದ ೧೫ ವರ್ಷದೊಳಗಿನವರ ತಂಡಕ್ಕೆ ಆಯ್ಕೆಯಾದ ಸ್ಮೃತಿ ೨ ವರ್ಷಗಳ ನಂತರ ೧೯ ವರ್ಷದೊಳಗಿನವರ ತಂಡಕ್ಕೂ ಆಯ್ಕೆಯಾದರು.

ಇಲ್ಲಿಂದ ಹಿಂತಿರುಗಿ ನೋಡದ ಸ್ಮೃತಿಯ ಮೊದಲ ಅದ್ಭುತ ಪ್ರದರ್ಶನವೆಂದರೆ ಅಕ್ಟೋಬರ್‌ ೨೦೧೩ರಲ್ಲಿ ವಡೋದರಾದಲ್ಲಿ ಮಹಾರಾಷ್ಟ್ರದ ಪರ ಹಾಗೂ ಗುಜರಾತ್‌ ವಿರುದ್ಧ ಆಡಿದ ೧೯ ವರ್ಷ ವಯಸ್ಸಿನೊಳಗಿನವರ ಪಂದ್ಯಾವಳಿಯಲ್ಲಿ ಕೇವಲ ೧೫೦ ಚೆಂಡುಗಳಲ್ಲಿ ಭರ್ಜರಿ ೨೨೪ ರನ್‌ಗಳ ದ್ವಿಶತಕ ಸಿಡಿಸಿದ್ದು.  ಇಂತಹ ಅನೇಕ ಪ್ರದರ್ಶನಗಳನ್ನು ನೀಡಿರುವ ಕೀರ್ತಿ ಸ್ಮೃತಿ ಅವರದ್ದು.

ನ್ಯೂಜಿಲೆಂಡ್‌ ತಂಡದ ವಿರುದ್ಧ ೨೦೧೯ರ ಫೆಬ್ರವರಿಯಲ್ಲಿ ಕೇವಲ ೨೪ ಎಸೆತಗಳಲ್ಲಿ ಗಳಿಸಿದ ಅತಿವೇಗದ ಅರ್ಧಶತಕ, ೨೦೧೭ರ ತ್ರಿಕೋನ ಸರಣಿಯಲ್ಲಿ ಆಸ್ಟ್ರೇಲಿಯಾ ವಿರದ್ಧ ಕೇವಲ ೩೦ ಎಸೆತಗಳಲ್ಲಿ ಗಳಿಸಿದ ಅರ್ಧಶತಕ, ಹಾಗೂ ಆಗಸ್ಟ್‌ ೩, ೨೦೧೮ರ ಮಹಿಳಾ ಕ್ರಿಕೆಟ್‌ ಸೂಪರ್‌ಲೀಗ್‌ನಲ್ಲಿ ಗಳಿಸಿದ ಮೊದಲನೆಯ ಶತಕ ಅವರ ಗಮನಾರ್ಹ ಸಾಧನೆಗಳಾಗಿವೆ.

ಕೆಲವೇ ದಿನಗಳ ಹಿಂದೆ ಮುಕ್ತಾಯವಾದ ಆಸ್ಟ್ರೇಲಿಯಾ ವಿರುದ್ಧದ ಗುಲಾಬಿ ಚೆಂಡಿನ ಹಗಲು-ರಾತ್ರಿ ಪಂದ್ಯವನ್ನು ಭಾರತ ಗೆಲ್ಲಲು ಸ್ಮೃತಿ ಮಂಧಾನರ ಆದ್ಭುತ ದಾಖಲೆಯ ಶತಕ ಕಾರಣವಾಯಿತು.  ಮಳೆಯಿಂದ ಪ್ರಭಾವಿತವಾದ ಪಂದ್ಯದಲ್ಲಿ ಟಾಸ್‌ ಗೆದ್ದ ಆಸ್ಟ್ರೇಲಿಯ ಭಾರತವನ್ನು ಮೊದಲು ಬ್ಯಾಟ್‌ ಮಾಡಲು ಆಹ್ವಾನಿಸಿತು.  ಆರಂಭಿಕ ಆಟಗಾರ್ತಿಯಾಗಿ ಕಣಕ್ಕಿಳಿದ ಸ್ಮೃತಿ ಇತರ ಆಟಗಾರ್ತಿಯರೊಡನೆ ಉತ್ತಮ ಜತೆಯಾಟಗಳನ್ನಾಡಿ ಭರ್ಜರಿ ಶತಕವನ್ನೂ ಸಿಡಿಸುವ ಮೂಲಕ ಭಾರತಕ್ಕೆ ಜಯ ತಂದಿತ್ತರು.

ಉತ್ತಮ ಹೊಡೆತಗಳ ಬಿರುಸಿನ ಆಟದ ಪ್ರದರ್ಶನ ನೀಡಿದ ಸ್ಮೃತಿ ದಾಖಲೆಯ ೧೨೭ ರನ್‌ಗಳನ್ನು ಬಾರಿಸಿ ಭಾರತ ತಂಡ ಉತ್ತಮ ಮೊತ್ತವಾದ ೩೭೭ ರನ್‌ ಗಳಿಸಲು ಕಾರಣರಾದರು.  ಆಫ್‌ಸೈಡ್‌ನಲ್ಲಿ ಆಕರ್ಷಕ ಹೊಡೆತಗಳನ್ನು ಬಾರಿಸುವಲ್ಲಿ ವಿಶೇಷ ಪ್ರತಿಭೆಯನ್ನು ಹೊಂದಿರುವ ಅವರ ಆಟ ಹೆಚ್ಚಿನ ಪ್ರಶಂಸೆ ಪಡೆದಿದ್ದು, ಭಾರತದ ಮಾಜಿ ಆಟಗಾರ ವಾಸಿಮ್‌ ಜಾಫರ್‌ ತಮ್ಮ ಟ್ವೀಟ್‌ನಲ್ಲಿ ಸ್ಮೃತಿಯವರನ್ನು “ಆಫ್‌ಸೈಡ್‌ನ ದೇವತೆ” ಎಂದು ಹೊಗಳಿದ್ದರು.

ಅತ್ಯದ್ಭುತ ಸಾಧನೆಯ ಮೂಲಕ ಮಹಿಳಾ ಕ್ರಿಕೆಟ್‌ ಲೋಕದಲ್ಲಿ ಭಾರತಕ್ಕೆ ಹೆಮ್ಮೆ ತರುತ್ತಿರುವ ಸ್ಮೃತಿ ಮಂಧಾನ ಇನ್ನೂ ಹೆಚ್ಚಿನ ಕೀರ್ತಿಯನ್ನು ಗಳಿಸಲಿ ಎಂದು ಹಾರೈಸೋಣ.