ಬೆಟ್ಟದ ನೆಲ್ಲಿಕಾಯಿಯಿಯ ಉಪಯೋಗಗಳ ಕುರಿತು ಹಿರಿಯ ಪತ್ರಕರ್ತ ಹರ್ಷವರ್ಧನ ಶೀಲವಂತ ಅವರು ಬರೆದ ಬರಹ ಇಲ್ಲಿದೆ. ಓದಿ, ನೀವೂ ನೆಲ್ಲಿಕಾಯಿಯ ಉತ್ಪನ್ನಗಳನ್ನು ಮನೆಯಲ್ಲಿಯೇ ತಯಾರಿಸಿಕೊಂಡು ಸವಿಯಿರಿ.
ಶ್ರೀ ತುಳಸಿ ಕಲ್ಯಾಣಂ!
ತುಳಸಿ ಮದುವೆಯ ಆಸುಪಾಸು ನಮ್ಮ ಕಡೆ ಗೌಳಿಗರು ದನ ಮೇಯಿಸಲು ಅಡವಿಗೆ ಹೋದಾಗ, ಅರಣ್ಯ ಉತ್ಪನ್ನವಾದ ಬೆಟ್ಟದ ನೆಲ್ಲಿಕಾಯಿ ಹೇರಳವಾಗಿ ಕೊಯ್ದು ತರುತ್ತಾರೆ. ಗೌಳಿ ಹೆಣ್ಣು ಮಕ್ಕಳು ಒಂದು ಟೊಂಗೆಗೆ 5 ಕಾಯಿಯಂತೆ ಸೂಜಿ-ದಾರದಿಂದ ಪೋಣಿಸಿಟ್ಟು, ನಾಗರಕಾಯಿ ಜೊತೆ ₹20 ರೂಪಾಯಿಗೆ ಒಂದು ಸಿವುಡು ಮಾರುತ್ತಾರೆ!
ಪೂಜೆ ಬಳಿಕ, ಆರತಿ ಎತ್ತಿದ ನಿರ್ಮಾಲ್ಯವಾಗಿ ಬೆಟ್ಟದ ನೆಲ್ಲಿ ಯಾವುದೋ ಗಿಡದ ಬುಡ, ಕಲ್ಯಾಣಿ, ಕೆರೆ ಆವಾರಕ್ಕೆ ಎಸೆಯಲ್ಪಡುತ್ತದೆ!
ಒಂದು ಕಾಲಪಾವಿಗೆ ₹50 ರಿಂದ ₹75 ರೂಪಾಯಿಗೆ, ಗಾತ್ರಕ್ಕೆ ತಕ್ಕಂತೆ ಪೇಟೆಯಲ್ಲಿ ಈ ಋತುಮಾನದಲ್ಲಿ ಮಾರಾಟಕ್ಕೂ ಲಭ್ಯ. ನನ್ನ ತಮ್ಮಂದಿರಾದ ಅಪ್ಪಾಸಾಹೇಬ ಶೀಲವಂತ ಹಾಗೂ ಬಸು ತಲವೈ ನಾಲ್ಕು ಕಾಲಪಾವುಗಳಷ್ಟು ಜವಾರಿ ಬೆಟ್ಟದ ನೆಲ್ಲಿ ತಂದು ಕೊಟ್ಟರು. ನನ್ನ ಮಹಾಲಕ್ಷ್ಮೀ ಹರ್ಷವರ್ಧನ ಶೀಲವಂತ ಅವುಗಳಿಂದ ಬೆಟ್ಟದ ನೆಲ್ಲಿಕ್ಯಾಂಡಿ ತಯಾರಿಸಲು ಮನಸ್ಸು ಮಾಡಿದಳು.
ನೆಲ್ಲಿಕಾಯಿ ಸ್ವಚ್ಛವಾಗಿ ತೊಳೆದೆವು. ಬಳಿಕ ಕಣ್ಣುಗಳಿದ್ದ ಪಾತ್ರೆಯಲ್ಲಿಟ್ಟು, ಉಗಿಯಲ್ಲಿ 10-15 ನಿಮಿಷಗಳ ಕಾಲ ಬೇಯಿಸಿದೆವು. 1 ಗಂಟೆ ಆರಲು ಬಿಟ್ಟೆವು. ಬಿಸಿ ಇದ್ದಾಗ ಕತ್ತರಿಸಿದರೆ ಕಾಯಿ ಹೋಳಾಗದು; ಮಿಜ್ಜಿಯಾಗುತ್ತವೆ. ಬಳಿಕ ಚಾಕು ಬಳಸಿ ಒಂದು ಕಾಯಿಯಲ್ಲಿ 4-5 ಹೋಳಾಗುವಂತೆ ಕತ್ತರಿಸಿದೆವು.
ಹೋಳುಗಳನ್ನು ಈ ಮೊದಲೇ ತಯಾರಿಸಿಟ್ಟುಕೊಂಡ, ಆರಿದ ಸಕ್ಕರೆ ಪಾಕದಲ್ಲಿ ಅದ್ದಿಟ್ಟೆವು. ಒಂದು ರಾತ್ರಿ ಪಾಕದಲ್ಲೇ ನೆಲ್ಲಿಕಾಯಿ ಹೋಳುಗಳಿದ್ದವು. ಬೆಳಗ್ಗೆ ಪಾಕದಿಂದ ತೆಗೆದು, ಹರಿವಾಣದಲ್ಲಿ ಹಾಕಿ, ಸಕ್ಕರೆ ಪುಡಿ, ಏಲಕ್ಕಿ ಜಜ್ಜಿದ ಪುಡಿ ಮೇಲೆ ಕಲಸಿ ಬಿಸಿಲಿಗೆ ಒಣಗಿಸಿದೆವು. (ಮಳೆ.. ಮಳೆ.. ಹೀಗಾಗಿ, ಅರೆ ಬಿಸಿಲಿಗೆ ಒಣಗುತ್ತಲೇ ಅರ್ಧ ಖಾಲಿ ಆಗಿವೆ!)
ಪೂರ್ತಿ ಒಣಗುವವರೆಗೆ ಬಿಸಿಲಿಗೆ ಒರಗಿಸಬೇಕು. ಕಪ್ಪೊಡೆದು ಎಲ್ಲ ಹೀರಿಕೊಂಡು, ಕಣ ಕಣ ಸದ್ದು ಬರುವಷ್ಟು ಹೋಳು ಸಿದ್ಧವಾಗುತ್ತವೆ. ವರ್ಷಪೂರ್ತಿ ಇಟ್ಟು ತಿನ್ನಬಹುದು. ಪೇಟೆಯಲ್ಲಿ 50 ಗ್ರಾಂನಷ್ಟು ಬೆಟ್ಟದ ನೆಲ್ಲಿ ಕ್ಯಾಂಡಿಗೆ ₹50 ರೂಪಾಯಿ ವರೆಗೆ ಬೆಲೆ ಇದೆ. ಅಂದಾಜು ₹20ರಷ್ಟು ಲಾಭ. ಬ್ರ್ಯಾಂಡ್ ಮಾಡಿದರೆ ವಿಶ್ವಾಸಾರ್ಹತೆ ಮತ್ತು ಖಾಯಂ ಗ್ರಾಹಕರನ್ನು ಹೊಂದಬಹುದು.. ಶ್ರಮ ಮಾತ್ರ ತುಂಬ ಇದೆ. ಲಾಭ ಕಮ್ಮೀನೆ.. ಶ್ರಮಕ್ಕೆ ಹೋಲಿಸಿದರೆ.
ಅಂದಾಜು 16 ಕ್ಕೂ ಹೆಚ್ಚು ನಮೂನೆಯ ಮೌಲ್ಯವರ್ಧಿತ ಉತ್ಪನ್ನಗಳನ್ನು ನಾವು ಅರಣ್ಯ ಉತ್ಪನ್ನ ಬೆಟ್ಟದ ನೆಲ್ಲಿಯಿಂದ ಉತ್ಪಾದಿಸಬಹುದು. 3-4ಪ್ರಜಾತಿಯ ಬೆಟ್ಟದ ನೆಲ್ಲಿಕಾಯಿಗಳಿವೆ. ವರ್ಷಪೂರ್ತಿ ಈ ಖಾದ್ಯ ಬಳಸಿಕೊಳ್ಳಬಹುದು.
ಉದಾಹರಣೆಗೆ –
೧. ನೆಲ್ಲಿಕಾಯಿ ಅಡಕೆ
೨. ನೆಲ್ಲಿಕಾಯಿ ಗುಳಂಬ
೩. ನೆಲ್ಲಿಕಾಯಿ ಕ್ಯಾಂಡಿ
೪. ನೆಲ್ಲಿಪುಡಿ ಕಷಾಯ
೫. ನೆಲ್ಲಿಕಾಯಿ ಸಾಫ್ಟ್ ಡ್ರಿಂಕ್ಸ್
೬. ನೆಲ್ಲಿಕಾಯಿ ಉಪ್ಪಿನಕಾಯಿ
೭. ನೆಲ್ಲಿಕಾಯಿ ಉಪ್ಪಿನಲ್ಲಿ ಅದ್ದಿಟ್ಟು ಬೇಕಾದಾಗ ಬಳಸುವುದು..
೮. ನೆಲ್ಲಿಕಾಯಿ ಹುಳಿ/ಗೊಜ್ಜು/ಸಾಂಬಾರು
೯. ನೆಲ್ಲಿಕಾಯಿ ಕೊಸಂಬರಿ
೧೦. ನೆಲ್ಲಿಕಾಯಿ ಶಾಂಪೂ
೧೧. ನೆಲ್ಲಿಕಾಯಿ ಫೇಸ್ ಪ್ಯಾಕ್
೧೩. ನೆಲ್ಲಿಕಾಯಿ ಕೇಶಕಾಂತಿ
೧೪. ನೆಲ್ಲಿಕಾಯಿ ಗುಟಿಖಾ
೧೫. ನೆಲ್ಲಿಕಾಯಿ ಮುಖಾ ವಾಸ್
೧೬. ನೆಲ್ಲಿಕಾಯಿ ತಂಬುಳಿ
ಶಾಂಪೂ ಹೊರತುಪಡಿಸಿ ಇಷ್ಟು ಉತ್ಪನ್ನಗಳನ್ನು ನಾವು ನಮ್ಮ ಮನೆಯಲ್ಲಿ ಮಾಡಿ, ಬಳಸಿ ನೋಡಿದ್ದೇವೆ. ಇವುಗಳನ್ನು ತಯಾರಿಸಲು ಅಣ್ಣ ಸಾವಯವ ಕೃಷಿಕ ಕ್ರಷ್ಣಕುಮಾರ್ ಭಾಗ್ವತ್ ಅವರ ಮಾರ್ಗದರ್ಶನಕ್ಕಾಗಿ ಧನ್ಯವಾದ ಅರ್ಪಿಸುತ್ತೇನೆ.
ಬರಹ ಮತ್ತು ಚಿತ್ರಕೃಪೆ: ಹರ್ಷವರ್ಧನ ಶೀಲವಂತ
ಇದನ್ನೂ ಓದಿ: ಪೇಜಾವರರಿಂದ ದೀಕ್ಷೆ ಪಡೆದ ಯಾದಗಿರಿಯ ಶ್ರೀಧರಾನಂದ ಸರಸ್ವತಿ ಸ್ವಾಮೀಜಿಯವರಿಂದ ಮತಾಂತರಕ್ಕೆ ತಡೆ, ಜನಜಾಗೃತಿ
Discussion about this post