ಹೆಚ್ಚು ತರಕಾರಿ ಸೇವಿಸಿ; ಪಾರ್ಶ್ವವಾಯುವಿನಿಂದ ದೂರವಿರಿ

ತರಕಾರಿ ಸೇವನೆಯಿಂದ ಪಾರ್ಶ್ವವಾಯು ತಗುಲುವ ಸಂಭವ ಕಡಿಮೆ. ಸಂಸ್ಕರಿಸಿದ ಕೆಂಪು ಮಾಂಸ ಮತ್ತು ಹೈನುಗಾರಿಕೆಗೆ ಬಳಸದ ಪ್ರಾಣಿಜನ್ಯ ಕೊಬ್ಬಿನಿಂದ ಪಾರ್ಶ್ವವಾಯು ತಗುಲುವ ಅಪಾಯ ಹೆಚ್ಚೆಂದು ಅಧ್ಯಯನ ತಿಳಿಸಿದೆ.

ಸಂಸ್ಕರಿಸಲ್ಪಟ್ಟ ಕೆಂಪು ಮಾಂಸ ಮತ್ತು ಹೈನುಗಾರಿಕೆಗೆ ಬಳಸದ ಪ್ರಾಣಿ ಜನ್ಯ ಕೊಬ್ಬಿನಾಂಶವನ್ನು ಸೇವಿಸುವುದರಿಂದ ಪಾರ್ಶ್ವವಾಯು ತಗುಲುವ ಅಪಾಯ ಜಾಸ್ತಿ ಇದೆ. ಆದರೆ ತರಕಾರಿಯಲ್ಲಿ ಕೊಬ್ಬಿನಾಂಶ ಕಡಿಮೆ ಇರುವ ಕಾರಣ ಪಾರ್ಶ್ವವಾಯು ಪೀಡನೆ ಕಡಿಮೆ ಎಂದು ಅಧ್ಯಯನವೊಂದು ಹೇಳಿದೆ.

ಹೃದಯ ರಕ್ತನಾಳ ವಿಜ್ಞಾನದಲ್ಲಿ ಆಗಿರುವ ಬೆಳವಣಿಗೆ ಕುರಿತಂತೆ ಈ ಅಧ್ಯಯನ ನಡೆದಿದ್ದು, ಶನಿವಾರದಿಂದ ಸೋಮವಾರದವರೆಗೆ ವರ್ಚುವಲ್‌ ಮೂಲಕ ನಡೆದ ಅಮೆರಿಕನ್‌ ಹಾರ್ಟ್ ಅಸೋಸಿಯೇಷನ್ಸ್‌ ಸೈಂಟಿಫಿಕ್‌ ಸೆಷನ್ಸ್‌ 2021ರಲ್ಲಿ ವರದಿ ಮಂಡನೆಯಾಗಿದೆ.

1984ರಿಂದ 2016 ಮತ್ತು 1986ರಿಂದ 2016ರವೆಗೆ ನಡೆಸಿದ ಎರಡು ಅಧ್ಯಯನಗಳಲ್ಲಿ 1,17,136 ಜನರ ಆಹಾರ ಕ್ರಮವನ್ನು ಅಭ್ಯಸಿಸಿ ಸಸ್ಯಜನ್ಯ ಮತ್ತು ಪ್ರಾಣಿಜನ್ಯ ಕೊಬ್ಬಿನಾಂಶ ಸೇವಿಸುವವರಲ್ಲಿ ಹೃದಯ ರಕ್ತನಾಳದಲ್ಲಿ ಸಮಸ್ಯೆ ಉಂಟು ಮಾಡುವ ಮತ್ತು ಪಾರ್ಶ್ವವಾಯು ತಗುಲುವ ಸಾಧ್ಯತೆಯನ್ನು ವಿಶ್ಲೇಷಿಸಲಾಗಿದೆ . ಇದರಲ್ಲಿ ಮಾಂಸಾಹಾರಿಗಳಿಗೆ ಹೋಲಿಸಿದರೆ ಸಸ್ಯಾಹಾರಿಗಳಲ್ಲಿ ಪಾರ್ಶ್ವವಾಯು ಪೀಡನೆ ಗಣನೀಯವಾಗಿ ಕಡಿಮೆ ಇದೆ. ಒಂದು ವೇಳೆ ಪಾರ್ಶ್ವವಾಯು ತಗುಲಿದರೂ ಸಸ್ಯಾಹಾರಿಗಳಲ್ಲಿ ಇದು ವಯಸ್ಸಾದ ಮೇಲೆ ಸಂಭವಿಸುವ ಅಪಾಯ ಆಗಿದೆ. ಆದರೆ, ಮಾಂಸಾಹಾರಿಗಳಲ್ಲಿ ಬೇಗನೆ ಅಂದರೆ ಸರಾಸರಿ 50 ವರ್ಷಕ್ಕೆ ಇದು ತಗುಲಿದೆ ಎಂದು ಹಾರ್ವರ್ಡ್ ವಿಶ್ವವಿದ್ಯಾಲಯದ ನ್ಯೂಟ್ರಿಷಿಯನ್‌ ವಿಭಾಗದ ಸಂಶೋಧಕ ಫೆಂಗ್ಲೀ ವಾಂಗ್‌ ಹೇಳಿದ್ದಾರೆ.

ಹೈನುಗಾರಿಕೆ ಬಳಸದ ಪ್ರಾಣಿಗಳ ಕೊಬ್ಬಿನಾಂಶ ಸೇವನೆಯು ಪಾರ್ಶ್ವವಾಯು ಸಂಭವವನ್ನು ಶೇ. 16 ಹೆಚ್ಚಿಸುತ್ತದೆ. ಸಂಸ್ಕರಿಸಿದ ಕೆಂಪು ಮಾಂಸವನ್ನು ಪ್ರತಿದಿನ ಸೇವಿಸುವವರಲ್ಲಿ ಪಾರ್ಶ್ವವಾಯುವಿಗೆ ತುತ್ತಾಗುವ ಅಪಾಯ ಶೇ. 12ರಷ್ಟು ಅಧಿಕ. ಡೇರಿ ಉತ್ಪನ್ನಗಳಾದ ಚೀಸ್‌, ಬೆಣ್ಣೆ, ಹಾಲು, ಐಸ್‌ಕ್ರೀಮ್‌, ಕ್ರೀಮ್‌ಗಳ ಸೇವಿಸುವವರಲ್ಲಿ ಪಾರ್ಶ್ವವಾಯು ತಗುಲುವಿಕೆ ಪ್ರಮಾಣ ಬಹಳ ಕಡಿಮೆ ಇದೆ ಎಂದು ಅವರು ತಿಳಿಸಿದ್ದಾರೆ.

ಇದನ್ನೂ ಓದಿ: ಸಸ್ಯಾಹಾರದಲ್ಲುಂಟು ಮಾಂಸಾಹಾರದಷ್ಟೇ ಪೋಷಕಾಂಶ