ಇಸ್ಲಾಮಾಬಾದ್: ಟ್ವೆಂಟಿ–20 ವಿಶ್ವಕಪ್ ಟೂರ್ನಿಯ ಮುಕ್ತಾಯದೊಂದಿಗೆ ಟೀಂ ಇಂಡಿಯಾದಲ್ಲಿ ವಿರಾಟ್ ಕೊಹ್ಲಿಯವರ ನಾಯಕತ್ವವೂ (ಟ್ವೆಂಟಿ–20 ಮಾದರಿ ಕ್ರಿಕೆಟ್‌ನಲ್ಲಿ) ಕೊನೆಗೊಂಡಿದೆ. ಮುಂಬರುವ ನ್ಯೂಜಿಲೆಂಡ್ ವಿರುದ್ಧದ ಟ್ವೆಂಟಿ–20 ಸರಣಿ ಹಾಗೂ ನಂತರದ ಟೂರ್ನಿಗಳಿಗೆ ರೋಹಿತ್ ಶರ್ಮಾ ಅವರನ್ನು ನಾಯಕನನ್ನಾಗಿ ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಘೋಷಿಸಿದೆ.
ಈ ಮಧ್ಯೆ, ರೋಹಿತ್ ಶರ್ಮಾ ಅವರನ್ನು ಟ್ವೆಂಟಿ–20 ಮತ್ತು ಏಕದಿನ ಕ್ರಿಕೆಟ್ ಎರಡೂ ಮಾದರಿಯ ನಾಯಕನನ್ನಾಗಿ ಕಾಣಲು ಬಯಸುತ್ತೇನೆ ಎಂದು ಪಾಕಿಸ್ತಾನದ ಮಾಜಿ ಆಲ್‌ರೌಂಡರ್ ಕ್ರಿಕೆಟಿಗ ಶಾಹೀದ್ ಅಫ್ರೀದಿ ಹೇಳಿದ್ದಾರೆ.
ಇದನ್ನೂ ಓದಿ: ICC T20 WC | ಡೇರಿಲ್ ಮಿಷೆಲ್ ಅಬ್ಬರಕ್ಕೆ ಮಂಕಾದ ಇಂಗ್ಲೆಂಡ್: ಫೈನಲ್‌ಗೆ ಲಗ್ಗೆ ಇರಿಸಿದ ನ್ಯೂಜಿಲೆಂಡ್
ಟೀಂ ಇಂಡಿಯಾ ಟ್ವೆಂಟಿ–20 ತಂಡದ ನಾಯಕನಾಗಿ ರೋಹಿತ್ ಶರ್ಮಾ ಅವರ ನೇಮಕಕ್ಕೆ ಪ್ರತಿಕ್ರಿಯಿಸಿದ ಅಫ್ರೀದಿ, ‘2008ರಲ್ಲಿ ಐಪಿಎಲ್‌ನಲ್ಲಿ ರೋಹಿತ್ ಜತೆ ಆಟವಾಡಿದ್ದೆ. ಅವರನ್ನು ಪೂರ್ಣಾವಧಿಯ ನಾಯಕನನ್ನಾಗಿ ಕಾಣಲು ಬಯಸುತ್ತೇನೆ’ ಎಂದು ಹೇಳಿದ್ದಾರೆ.
‘ಐಪಿಎಲ್‌ ಟೂರ್ನಿಯಲ್ಲಿ ‘ಡೆಕ್ಕನ್ ಚಾರ್ಜರ್ಸ್’ ತಂಡದ ಪರವಾಗಿ ರೋಹಿತ್ ಜತೆ ಒಂದು ವರ್ಷ ಆಡಿದ್ದೆ. ಅವರೊಬ್ಬ ಅದ್ಭುತ ಆಟಗಾರ. ಬ್ಯಾಟಿಂಗ್‌ನಲ್ಲಿ ಅವರ ಹೊಡೆತಗಳ ಆಯ್ಕೆ ಚೆನ್ನಾಗಿದೆ. ಅವರು ಅಗತ್ಯವಿದ್ದಾಗ ರಿಲ್ಯಾಕ್ಸ್‌ ಆಗಿ ಇರುತ್ತಾರೆ ಹಾಗೂ ಬೇಕೆನಿಸಿದಾಗ ಕೋಪಗೊಳ್ಳುವುದೂ ಅವರಿಗೆ ಗೊತ್ತಿದೆ. ಎರಡೂ ರೀತಿಯಲ್ಲಿ ಅವರನ್ನು ಕಂಡಿದ್ದೇನೆ. ಅವರಿಗೆ ನಿಜವಾಗಿಯೂ ಅವಕಾಶ ನೀಡಬೇಕು’ ಎಂದು ‘ಸಮಾ ಟಿವಿ’ಗೆ ನೀಡಿದ ಸಂದರ್ಶನದಲ್ಲಿ ಅಫ್ರೀದಿ ಹೇಳಿದ್ದಾರೆ.
ವಿರಾಟ್ ಕೊಹ್ಲಿ ಅವರ ಬಗ್ಗೆ ಮಾತನಾಡಿದ ಅವರು, ಎಲ್ಲ ಮಾದರಿಯ ಕ್ರಿಕೆಟ್‌ನಲ್ಲಿ ಭಾರತೀಯ ಕ್ರಿಕೆಟ್ ತಂಡದ ನಾಯಕನಾಗಿ ಜವಾಬ್ದಾರಿ ನಿರ್ವಹಿಸುವುದು ಅಷ್ಟು ಸುಲಭದ ಕೆಲಸವಲ್ಲ. ಕೊಹ್ಲಿ ಅವರು ನಾಯಕತ್ವ ಬಿಟ್ಟುಕೊಟ್ಟಿದ್ದಾರೆ. ಅವರಿಗೆ ಬ್ಯಾಟಿಂಗ್ ಮಾಡುವುದನ್ನು ಆಸ್ವಾದಿಸಲು ಬಿಡಬೇಕು ಎಂದು ಹೇಳಿದ್ದಾರೆ.
ಇದನ್ನೂ ಓದಿ: ವಿಶ್ವಕಪ್‌ನಿಂದ ಟೀಂ ಇಂಡಿಯಾ ಔಟ್: ನಿರ್ಗಮಿತ ಕೋಚ್ ರವಿ ಶಾಸ್ತ್ರಿ ಕೊಟ್ಟ ಕಾರಣಗಳೇನು?
‘ವಿರಾಟ್ ಅವರು ಆಟಗಾರನಾಗಿ ತಂಡದಲ್ಲಿ ಮುಂದುವರಿಯಬೇಕು. ಆಗ ಕಡಿಮೆ ಒತ್ತಡ ಇರುತ್ತದೆ. ಅವರು ಕೂಡ ಸಾಕಷ್ಟು ಕ್ರಿಕೆಟ್ ಆಡಿದ್ದಾರೆ. ಭಾರತ ಹಾಗೂ ಪಾಕಿಸ್ತಾನದಂಥ ದೇಶಗಳ ಕ್ರಿಕೆಟ್ ತಂಡದ ನಾಯಕತ್ವ ನಿರ್ವಹಿಸುವುದು ಅಷ್ಟು ಸುಲಭದ ಮಾತಲ್ಲ. ಉತ್ತಮವಾಗಿ ನಾಯಕತ್ವ ನಿರ್ವಹಿಸುತ್ತಿರುವವರೆಗೆ ಎಲ್ಲವೂ ಸುಲಭವಾಗಿ ಇರುತ್ತವೆ. ಕೊಹ್ಲಿ ಅವರು ಇನ್ನು ಬ್ಯಾಟಿಂಗ್ ಮೇಲೆ ಗಮನಹರಿಸುವ ಮೂಲಕ ಕ್ರಿಕೆಟ್ ಅನ್ನು ಆಸ್ವಾದಿಸಬಹುದು ಎಂದು ಅಫ್ರೀದಿ ಹೇಳಿದ್ದಾರೆ.
Discussion about this post