Aarya 2 Trailer: ಕುಟುಂಬದ ರಕ್ಷಣೆಗಾಗಿ “ಡಾನ್‌” ಅವತಾರ ಎತ್ತಿದ ಸುಶ್ಮಿತಾ ಸೇನ್

ಬೆಂಗಳೂರು: ಮಾಜಿ ವಿಶ್ವಸುಂದರಿ ಸುಶ್ಮಿತಾ ಸೇನ್ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಆರ್ಯ 2 ಸರಣಿಯ ಟ್ರೈಲರ್‌ ಬಿಡುಗಡೆಯಾಗಿದೆ. ಪ್ರಥಮ ಭಾಗದಲ್ಲಿ ಆರ್ಯ ತನ್ನದೇ ತಂದೆಯ ಆದೇಶದಂತೆ ತನ್ನ ಗಂಡನ ಹತ್ಯೆಯಾದ ನಂತರ ತನ್ನ ಮಕ್ಕಳೊಂದಿಗೆ ದೇಶ ತೊರೆಯುವ ಚಿಂತನೆ ಮಾಡುತ್ತಾಳೆ. ಕೆಲವು ಅನೈತಿಕ ವ್ಯವಹಾರಗಳಲ್ಲಿ ಸಿಲುಕಿದಾಗ ದುಷ್ಟಕೂಟದ ಕೆಂಗಣ್ಣಿಗೆ ಗುರಿಯಾಗುತ್ತಾಳೆ.

ಟ್ರೈಲರ್ ಪ್ರಕಾರ ಆರ್ಯ ದೇಶ ತೊರೆದು ವಿದೇಶಕ್ಕೆ ಹೋದದ್ದಲ್ಲದೆ ದುಷ್ಕರ್ಮಿಗಳ ವಿರುದ್ಧ ಹೋರಾಡಲು ಸಕಲ ಸಿದ್ಧತೆಗಳನ್ನೂ ಮಾಡಿಕೊಂಡೇ ಮರಳಿ ಬರುತ್ತಾಳೆ. ಶೆಖಾವತ್‌ನ ತಂದೆ ಇವಳ ವಿರುದ್ಧ ಸೇಡು ತೀರಸಿಕೊಳ್ಳಲು ಕಾಯುತ್ತಿದ್ದರೆ ಅವಳ ಸಹೋದರ ಕೂಡಾ ಇದಕ್ಕಾಗಿಯೇ ಕಾಯುತ್ತಿರುತ್ತಾನೆ. ಇದರೊಂದಿಗೆ ರಷ್ಯಾದ ಗುಂಪು ಸಹ ದುಡ್ಡಿಗಾಗಿ ಇವಳ ಹಿಂದೆ ಬಿದ್ದಿರುತ್ತದೆ. ತನ್ನ ಕುಟುಂಬವನ್ನು ತನ್ನ ವಿರೋಧಿಗಳಿಂದ ರಕ್ಷಿಸಿಕೊಳ್ಳಲು ಆರ್ಯ ಮತ್ತೊಮ್ಮೆ ಖುದ್ದು ಹಿಂಸೆಗೆ ಇಳಿಯಬೇಕಾದ ಪರಿಸ್ಥಿತಿ ಉದ್ಭವಾವಾಗಿರುವಂತೆ ಟ್ರೈಲರ್‌ನಿಂದ ತಿಳಿದುಬರುತ್ತದೆ.

ಮೊದಲ ಭಾಗದಲ್ಲಿ ತೀವ್ರ ಕುತೂಹಲ ಉಳಿಸಿಕೊಂಡಿದ್ದ ಚಿತ್ರವು ಎರಡನೆಯ ಭಾಗದಲ್ಲೂ ಅದೇ ಸಾಧನೆ ಮಾಡುವಲ್ಲಿ ಯಶಸ್ವಿಯಾಗುತ್ತದೆ.

ಸರಣಿಯ ಎರಡನೆಯ ಭಾಗ ಬಿಡುಗಡೆಯಾಗುತ್ತಿರುವ ಕುರಿತು ಮಾತನಾಡಿದ ಸುಶ್ಮಾ ಸೇನ್ ಪ್ರಥಮ ಭಾಗವು ಅಂತರರಾಷ್ಟ್ರೀಯ ಎಮ್ಮಿ ಪ್ರಶಸ್ತಿಗೆ ನಾಮಾಂಕಿತಗೊಂಡಿದ್ದರಿಂದ ನಾವು ಬಹಳ ಉತ್ಸಾಹಿತರಾಗಿದ್ದೇವೆ ಎಂದು ತಿಳಿಸಿದರು. ಚಿತ್ರದ ಎರಡನೆಯ ಭಾಗವು ಕೇವಲ ಆರ್ಯಳಿಗೆ ಮಾತ್ರ ಸೀಮಿತವಾಗದೆ ಒಬ್ಬ ಪ್ರಬಲ ಹೋರಾಟಗಾರ್ತಿಯ ಕತೆಯಾಗಿದೆ ಎಂದರು. ಎರಡನೆಯ ಭಾಗದಲ್ಲಿ ನನ್ನ ಪಾತ್ರದ ಕುತೂಹಲಕರ ಅಂಶವು ಹೊರಬಂದಿದ್ದು ನನಗೆ ನಟಿಯಾಗಿ ಒಂದು ದೊಡ್ಡ ಕಲಿಕೆಯ ಪ್ರಕ್ರಿಯೆಯಾಗಿದೆ ಎಂದರು. ಈ ಪಾತ್ರಕ್ಕೆ ನ್ಯಾಯ ಒದಗಿಸಲು ನಾನು ನನ್ನೊಂದಿಗೆ ನನ್ನನ್ನೇ ಸ್ಪರ್ಧೆಗೆ ಒಡ್ಡಿಕೊಂಡಿದ್ದು ಪ್ರೇಕ್ಷಕರು ನನ್ನ ಪಾತ್ರದ ತೀವ್ರತೆ ಹಾಗೂ ಕ್ಷಮಾಯಾಚನೆಯ ಭಾವವಿಲ್ಲದ ಅಭಿನಯವನ್ನು ಮೆಚ್ಚುತ್ತಾರೆನ್ನುವ ಭರವಸೆಯಿದೆ ಎನ್ನುತ್ತಾರೆ ಸುಶ್ಮಿತಾ.

ಸರಣಿಯ ಎರಡನೆಯ ಭಾಗದ ಬಗ್ಗೆ ಮಾತನಾಡಿದ ನಿರ್ದೇಶಕ ರಾಮ್‌ ಮಧ್ವಾನಿ ಪ್ರಥಮ ಭಾಗಕ್ಕೆ ಸಿಕ್ಕ ಪ್ರೀತಿ ಮತ್ತು ಮೆಚ್ಚುಗೆ ಎರಡನೆಯ ಭಾಗವನ್ನು ಇನ್ನೂ ಹೆಚ್ಚಿನ ಶ್ರದ್ಧೆ ಹಾಗೂ ಪರಿಶ್ರಮಗಳಿಂದ ಚಿತ್ರಿಸಲು ನಮಗೆ ಪ್ರೇರಣೆಯಾಯಿತು ಎಂದರು. ಎರಡನೆಯ ಭಾಗಕ್ಕೆ ಪ್ರೇಕ್ಷಕರ ಪ್ರತಿಕ್ರಿಯೆ ಹೇಗಿರುತ್ತದೆ ಎಂದು ತಿಳಿಯಲು ನಾನು ಅತ್ಯಂತ ಕಾತರನಾಗಿದ್ದೇನೆ ಎಂದ ಅವರು ಎರಡನೆಯ ಭಾಗದಲ್ಲಿ ನಾಯಕಿಯು ತನ್ನ ಕುಟುಂಬವನ್ನು ಸುರಕ್ಷಿತವಾಗಿಡುವ ಹಾಗೂ ತನ್ನ ಸೇಡನ್ನೂ ತೀರಿಸಿಕೊಳ್ಳುವ ಪ್ರಯತ್ನದ  ಪ್ರತಿ ಹೆಜ್ಜೆಯಲ್ಲಿ ಸವಾಲುಗಳನ್ನು ಎದುರಿಸಲಿದ್ದು ಪ್ರೇಕ್ಷಕರನ್ನು ರಂಜಿಸಲಿದ್ದಾಳೆ ಎಂದರು.

ಸುಶ್ಮಿತಾ ಸೇನ್‌ರೊಂದಿಗೆ ಸಿಕಂದರ್ ಖೇರ್, ಚಂದ್ರಚೂಡ್‌ ಸಿಂಗ್, ನಮಿತ್‌ ದಾಸ್, ಜಯಂತ್ ಕೃಪಲಾನಿ, ಹಾಗೂ ಮನೀಶ್‌ ಚೌಧರಿ ಚಿತ್ರದ ತಾರಾಗಣದ ಭಾಗವಾಗಿದ್ದಾರೆ.

ಈ ಸರಣಿಯ ಮೊದಲ ಭಾಗವು ಅತ್ಯುತ್ತಮ ಕಥಾನಾಟಕಗಳ ವಿಭಾಗದಲ್ಲಿ ಇದೇ ವರ್‍ಷದ ಅಂತರ ರಾಷ್ಟ್ರೀಯ ಎಮ್ಮಿ ಪ್ರಶಸ್ತಿಗೆ ನಾಮಾಂಕಿತವಾಗಿತ್ತು ಎಂಬುದನ್ನು ಇಲ್ಲಿ ಸ್ಮರಿಸಬಹುದಾಗಿದೆ.

Sushmita Sen plays the role of a don in Aarya 2 to take revenge and to protect her own family

ಇದನ್ನೂ ಓದಿ: ಬಾಲಿವುಡ್ ನಟಿ ದಿಶಾ ತಂಗಿ ಲೆಫ್ಟಿನೆಂಟಾ? ಪ್ರಶ್ನೆ ಮೂಡಿಸಿದೆ ಈ ಫೋಟೊ

ಇದನ್ನೂ ಓದಿ: ಮಗಳು ವಮಿಕಾ, ಮುಂದಿನ ವೃತ್ತಿಜೀವನದ ಬಗ್ಗೆ ಏನಂತಾರೆ ಬಾಲಿವುಡ್ ನಟಿ ಅನುಷ್ಕಾ ಶರ್ಮಾ?